دیار بكر — آسیای عثمانیده غایت مستحصن بر شهر اولوب (دجله) نهرینك صاغ طرفنده واقع و بو نامده بر ولایتك مركزیدر غایت مرتفع و یتمش ایكی قله+لی بر سور شهرك دائراً مادار اطرافنی احاطه ایلر و بو سورك زمان انشاسی رومالولره حمل ایدیلور. اطرافنده اثمار نفیسه یتشدیرر كوزل باغچه+لری و منتظم و مشهور جامعلری و مناسترلری و روم و یعقوبی و لاتین كلیسالری و خرستیانلره مخصوص بعض زیارتكاهلری واردر. صوف پاموق و ایپك قماشلر انواعی و هر نوع مطبخ و سفره+یه متعلق باقر اوانی یاپلور. اشبو شهر برچوق دفعه+لر خراب اولمش و (الانس) و (الاتنیه+ن) زمانلرنده صوك دفعه اولمق اوزره مجدداً انشا ایدیلوب متعاقباً عجملر و روملرك ید استیلاسنه دوشدكدن صكره (٩٥٧ م و ٣٤٧ ه) تاریخنده ید اسلامیانه انتقال ایلمشدر.
دیاربكر ولایتی ارمنستان صغری و نهرین بیننك قسم شمال غربیسنی شاملدر
شمالاً ارضروم و سیواس و شرقاً و جنوباً و غرباً حلب و موصل ولایتلری ایله تحدید اولنور طولاً اوچیوز یكرمی سكز و عرضاً یوزالتمش طقوز كیلومترو وسعتنده اولوب كرد عثمانلی عرب ارمنی و یهودیدن عبارت اولمق اوزره درت یوز بیك نفوسی جامعدر. متنوع برچوق معادنی وار ایسه ده متروك حكمندە+در. دیاربكر شهرینه مقدما (امد) دنیلور ایدی.