دمیری — اسمی كمال الدین محمد بن موسی الدمیریدر افاضل علمای شافعیه+دن بری اولوب (١٣٤١ م و ٧٤٢ ه) تولد و (١٤٠٥ م و ٨٠٨ ه) تاریخنده وفات ایلمشدر اوائل حالنده ترزیلكله مشغول ایدی مؤخراً مقراض هدایت دكانچۀ نظرندن پردۀ غفلتی چاك ایتمكله متاع چارسوی فنادن قطع علایق و تجرد و بالكلیه تحصیل علوم و فنونه دیده دوز تقید و یاوریء توفیق ایله آز وقت ایچنده میدان معرفته نصب خیمۀ تفرد ایلدی.
كمال زهد و اتقاسنه مبنی قطعاً تقلد قضایه رضا ویرمدیكی كبی فرط تواضعندن ناشی عمرنده البسۀ فاخره اكتساسنه راغب و مراكب قارهه+یه راكب اولمامشدر.
جملۀ تألیفاتندن بری (حیوة الحیوان) نام كتابدركه صغری و كبری نامیله ایكی اوله+رق هر ایكیسیده مؤلف مومی الیهک كمال مهارتنه دلالت ایدر (دمیر) مصرده بر قریه اسمیدر.