دره بل — اهل حكمت و جراثقالدن بر ذاتدر فلمنکده كائن (القماآر) شهرنده (١٥٧٢ م و ٩٨٠ ه) تاریخنده تولد و (١٦٣٤ م و ١٠٤٤ ه) تاریخنده لوندره+ده وفات ایلدی. ایكنجی (فردیناند)ك اوغللرینك معلمی و مجلس خاصنده اعضا ایدی. بر محاربه+ده اسیر دوشوب قورتلدقدن صكره لوندرە+ده اختیار اقامت و بقیۀ عمرینی اوراده امرار ایلدی. مومی الیه (١٦٢١ م و ١٠٣١ ه) تاریخنده اسمی ایله معروف میزان الحراره+یی اختراع ایلمشدر اشبو میزان هوا طولو بر قابدن و صو ایله مملو و مذكور قابه منتهی بر بوریدن عبارتدركه قاب ایچنده اولان هوا منبسط و منقبض اولدقجه بوری ایچنده بولنان صو ستونی صعود و نزول ایدرك درجاتی ارائه ایدر (خرده+بین)ك اختراعی دخی بر اساسه مستند اولمیه+رق بو ذاته حمل ایدیلور. بولندیغی زمانده جهلا نزدنده سحرباز نامیله شهرت بولمشیدی.
جوهر اثیر و عناصر طبیعیه+یه دائر فلمنك لسانی اوزره ایكی تألیفی دخی واردر.