ابو یوسف — ائمۀ حنفیه+دندر و مولدی كوفه اسمی
یعقوب بن ابراهیمدر. مشار الیه ابتدای تحصیلنده زیاده+سیله ضرورت
ایچنده بولندیغندن والده+سی درسنی ترك ایدوب بر صنعته سلوك ایتمسنی
تنبیه و اجبار ایدر و خواجه+سی اولان امام اعظم حضرتلری درسنی
ترك ایتمامك ایچون اعانه بیورر ایدی تكمیل علوم ایدوب بغداده
هجرت ایلدكده بالجمله بغداد علماسی نزدنده مشار بالبنان و آز وقت ایچنده
قاضی القضاة رتبۀ رفیعه+سیله كامران اولدی. بر كون امرادن بر معتبر
ذاتك شهادتنی رد ایتدیكندن او ذات كیدوب خلیفه هارون الرشیده
شكایت ایلدی هارون الرشید دخی ابو یوسفی چاغیروب شهادتنك
ردی سببنی سؤال ایلدكده (بونك دائما حضوریكزده بن سزك قولكزم
دیدیكنی ایشیدییورم اكر بو كلامنده صادق ایسه قولك شهادتی
مشروع دكلدر و اكر كاذب ایسه كاذبك دخی شهادتی مسموع
دكلدر انك ایچون رد ایتدم) جوابنی ویردی. التمش طقوز سنه
معمر اولدقدن صكره وفاتی (٧٩٨ م و ١٨٢ ٥) تاریخنده+در.