ابو یزید بسطامی — كبار اولیاء اللهدندر و اسمی طیفور
بن عیسی+در و طریقتده نسبت علیه+لری بش واسطه ایله (ابو بكرالصدیق)
رضی الله عنه حضرتلرینه موصولدر. بو ذات عالیقدر عشقده استغراقی
و عبادات و طاعاتده مجاهده+یی اول درجه+یه واردیرمش ایدیكه نماز قیلاركن
جناب حقك هیبت و جلالندن و شریعت مطهره+یه تعظیمندن ناشی كوكسنك
كمكلری قاغشدار ایدی. حال احتضارنده (آلهی ماذكرتنك الا
عن غفلة و ما خدمتك الا عن فترة) بیوروب تسلیم روح ایتمشدر.
مخلصلرندن بری مشارالیهی رؤیاسنده كوروب حالكز نیجه+در دیو سؤال
ایتدكده بكا نه كتوردك دیو سؤال ایتدیلر بن دخی بر درویش بر
پادشاهك قپوسنه كلدیكی وقت نه كتوردك دیمزلر بلكه نه استرسك دیرلر
دیدم اندن صكره بر سؤال وقوعبولمدی بحمدالله نعم آلهیه ایله متلذذم
بیوردی. حال استغراقده بن خیمه+یی عرشك برابرنده قوردم دیمش
اولدیغنی روایت ایدرلر ایسه ده صحیح دكلدر. ارتحاللری (874 م
و 261 یاخود ٢٣٤ ه) تاریخنده+در و تربۀ شریفه+لری حلب ملحقاتندن
عمق اوە+سنده+در.