خوقند — آسیاده واقع تركستان اقلیم جسیمنك حاوی اولدیغی خانلقلردن بو نامده اولان بر خانلغك مقر ادارە+سیدر. سیردریا نهری قربنده و سمرقندك (٢٧٠) میل اعشاری شمال شرقیسنده واقع و درتیوز باب جوامع شریفه+یی و برچوق كاربان سرایی و بعض اثار عتیقه+یی حاویدر چوقه معمولاتی و منسوجات قطنیه و حریریه+سی شهرتلوجه+در مشهور جنكیر خان شهر مزبوری مقر حكومت اتخاذ ایتمش و تیمور خان ایسه شهر مزبوره ترتیب و اجرا ایتدیكی بر سورده كندوسنه تبعیت ایدن حكمداران طرفلرندن مبعوث اولمق اوزره بشیوز نفر سفیر تجمع ایلمشدر مذكور خانلق شمالاً قراقالپاق اراضیسی وجنوباً بخارا و حصار خانلقلری و شرقاً كاشغر اقلیمی ایله محدود و طولاً ٥٤٠ و عرضاً ٢٠٠ میل اعشاری اتساعنده و اوچ ملیون نفوسی حاوی اولوب انجق روسلر بو خانلغی (١٨٦٦ م دن ١٧٧٥) تاریخنه دكین كاه استعمال خدعه و کاه محاربه ایله اوغراشه+رق ضبط و استیلا ایلمشلردر.