خلاف — ادلۀ اجمالیه یاخود تفصیلیه+دن مأخوذ و وجوه استنباطات مختلفه+دن باحث بر علمدر وجوه مذكوره+دن هربرینه علمادن بر طائفه ذاهب اولمشلردركه جمله+سنك افضلی امام اعظم و اصحابندن اولان ابو یوسف و محمد و زفر و امام شافعی و امام مالك و امام احمد بن حنبل حضراتیدر.
بو علم شول جدلدركه ائمۀ حنیفه و شافعیه كبی اصحاب مذاهب بیننده واقع اولور بونكله علم جدل بیننده فرق ماده و صورت ایله+در زیرا جدل مواد ادلۀ خلافیه+دن و علم خلاف ایسه صور ادله+دن بحث ایدر بوندن غرض تحصیل ملكۀ ابرام و نقضدر فائده+سی شكوكی مذهبدن دفع و تحویل و مذهب مخالفه ایقاع و تحمیلدر بعض علما علم خلافده اون و بعضیلری یكرمی و نهایت قرق اللی+یه قدر مسائل جمع ایدرك انموزج حالنه كتورمشلردر بونلردن بشقه مسائل و تعلیقات وار ایسه ده زمانمزده كتابلری غیر موجود و معالم آثاری محو و نابود اولمشدر
دنیاده علم خلافی اك اول اخراج ایلیان (ابو زید دبوسی) دركه حنفی المذهب اولوب علم نظر و استخراج حجج ده كندوسیله ضرب مثل اولنور. اسمی عبیدالله بن عمر بن عیسی+در اصول فقهدن (كتاب الاسرار) و كتاب (تقویم الادله) ایله (كتاب الامدالاقصی)یی تألیف ایلدی وفاتی (١٠٣٨ م و ٤٣٠ ه یاخود ٤٣٢ ه) تاریخنده بخاراده+در