خسرو دهلوی — ماوراء النهرده (كش) شهرنده لاچین امیر زاده+لرندن امیر محمودك صلبندن كلدی. پدری مرقوم جنكیز خان معركه+سنده ماوراءالنهردن هنده فرار ایله (دهلی) حكمداری سلطان محمد تغلقشاهه كسب تعلق و رتبۀ امارته قدر تفوق ایلدیكی حالده بر غزاده شهید اولدیغندن اوغلی اشبو خسرو یرینه كچتورلمشیدی. مومی الیهك سلامت اشعار و نفاست كفتاری مسلم صغار و كبار اولوب خصوصیله حكمدار مشارالیه حقنده یازدیغی (بحرالابرار) (انیس القلوب) (مرأت السفا) قصائدی هركون مدحه سزاواردر. اون سكز بیك بیتی شامل (خمسه) و ملك دهلی علاءالدین حقنده (قران سعیدین) و (مناقب هند) و (تاریخ دهلی) نام منظومه+لریله علم موسیقی و سائره+ده اولان تألیفاتی طقسان طقوز جلده بالغ اولدیغی و بر رساله+سنده دخی (مجموع اشعارم
درت یوزله بش یوز بیک آره+سنده اولمق كرك) عباره+سی محرر بولندیغی محكیدر. سلطان ( سعید بایسنغر) ابیاتنی جمعه چوق چالیشوب یكرمی ایكی بیك مقدارینی جمع ایده+بیلمشدر. (خسرو) حیاتنده اشعارینی درده تقسیم ایدوب حال صغرنده یاپدیغنه (تحفة الصغر) و هنوز بدأ و سلوكی زماننده سویلدیكنه (وسط الحیوة) و اوائل شیخوختنده انشاد ایتدیكنه )قرة الكمال) و دم پیری و هرمده اولان آثارینه (بقیة البقیة) تسمیه ایلمش و اویله+جه شهرت بولمشدر. (جواهرالاسرار) صاحبی آذری و شیخ سعدی شیرازی كبی پیران معارف بو ذاتله كورشمك ایچون قوجه هند سفرینی اختیار ایلدیلر. موم الیه مؤخراً امارتدن فراغتله كملین مشایخ هندیه+دن شیخ نظام الدینك دامن رشادتنه صارلمش و كافۀ ماملكنی فی سبیل الله افنا ایله مطلوب حقیقی+یه دخی واصل اولمشدر تاریخ ولادتیمعلوم دكلسه ده برچوق زمان معمر اوله+رق (١٣٢٤ م و ٧٢٥ ه) سنه+سی دهلیده وفات ایلدی.
رباعیاتندن
اقبال رابقا نبود دل بر ومبند * عمری كه در غرور كذاری هبا بود
و رنیست باورت زمن این نكتۀ شریف * اقبال راچو قلب كنی لا بقا بود