خرواتستان نام دیكر (لیبورینا) — وندیك كورفزینك شرق و شمال شرقیسنده بر قطعۀ جسیمه و مهمه+در غرباً (ایلیریا) شرقاً (اسقلاونیا) و بوسنه ایله تحدید اولنور. اشبو قطعه اسلاولر طرفندن مسكون اولوب دولت علیه ایله آوستریا بیننده تقسیم اولنمش ایدی.
ًاوستریا خرواتستانی شمالاً مجارسان شرقاً اسلاو وینا جنوباً بوسنه و غربا ایلیریا ایالتی ایله محدود اولوب بر ملیون نفوسی حاوی و مقر ادارە+سی (اغرام) شهریدر. اشبو قطعه مجارستان قسمندن معدود (اغرام و كروز و واردین) نام اوچ اداره مختلفه+یه منقسمدر طاغ و اورمانلری و برچوق معدن و معدن كمورلری واردر شمال جهتندن ماعدا اراضیسی غیر منبت اولدیغی كبی صنایعی هیج مقوله+سندن اولوب تجارتی دخی پك آزدر.
دولت علیه خرواتستانی (هرسك)ك شمالنده و (رباس) ایله (اوننا) نهرلری بیننده بوسنه ولایتی داخلنده و دولت علیه+نك رأس حدود غربیسنده
بولنور (غرادشقه) (دوبیكزا) ( نووی) (اوناقز) باشلیجه شهرلریدر. خرواتستان ایلیریانك بر قسمندن متشكل اولوب رومالیلر اشبو قطعه+یه لییورنیا مؤخراً (قور بادیا) اسمنی طاقدیلر ایدی. خروتستان (٦٢٥ م و ٤ ه) تاریخندن (٦٤١ م) تاریخنه دكین مستقل بر قرالیت تشكیل ایلدیسه ده سكزنجی عصرده شارلمانك و طقوزنجی عصرده روم ایمپراطورلرینك نفوذ و حمایه+سی التنه كیروب (١٠٩١ م و ٤٨٤ ه)دن (١١٠٢ م) تاریخنه دكین قسم اعظمی مجارلیلر طرفندن تسخیر اولندی و اولوقتدن برو مجارلیلرك تحت ضبطنده قالوب مؤخراً بو نام ایله آوستریایه كچدی. فرانسزلر دخی ١٨٠٩(١٨٠٩ م و ١٢٢٤ ه)دن ( ١٨١٥ م) تاریخنه قدر اوستریا خرواتستاننه متصرف اولمشلردر. شمدی خرواتلرك بر قسمی قتولك دیكر قسمی اورتودقس مذهبنده+درلر.