لغات تاریخیه و جغرافیه

Lugat-ı Tarihiyye ve Coğrafiyye

ابو مدین المغربی

ابو مدین المغربی — كبار اولیاء اللهدندر و اسمی شعیبدر توحید و توكلده مشایخ صوفیه+نك امامی ایدی (محیی الدین العربی) حضرتلری كبی پك چوق ذوات كرام بو ذات عالیقدرك همت و صحبتیله واصل مرام اولمشدر. خلقك اللرینی تبرك قصدیله مشارالیهه سوروب اوپدكلرینی مشایخ كرامدن بعضیلری كوروب نفسكزده بوندن بر اثر فخر حس بیوریله+یورمی دیو سؤال ایتدكلرنده بنم حالم حجر الاسوده مشابهدر بونجه انبیاء و اولیاء انی تقبیل ایدرلر انك حجریتی ذره قدر تغیر ایتمز جوابنی ویردی. بر ذات شیطانی رؤیاسنده كوروب ابو مدین ایله نصلسك دیو سؤال ایتدكده شیطان بنم انی اضلاله سعیم كلابك دریایه تبولی كبیدر دیدی بو فقره شیخ اكبر حضرتلرینك فتوحاتنده مسطوردر. ابو مدین حضرتلرینك بر دفعه كفار الینه اسیر دوشوب سفینه+یه آتلدیغی و هواده مساعد روزكار وار ایكن سفینه+نك حركتدن قالدیغی و سفینه قپودانی كیفیتی اكلایوب سائر اسرای اسلامیه ایله برابر سبیلنی تخلیه ایتدیكی مشهور و متواتردر و وفاتی (١١٩٣ م و ٥٨٩ ه) تاریخنده+در.