حكومت — حكومت روحانیه+دن بشقه اولان حكومت (جسمانیه) یاخود (مادیه) مطلقه و مشروطه و جمهوریه ناملریله اوچ قسمه منقسمدر قوۀ قانونیه و قوۀ انفاذیه+یی ید استقلالنه آلان یعنی عنان حكومتی بتون بتون دست اقتدارنده طوتان حكمدارلرك حكومتنه حكومت مطلقه . و وكلای دولتدن بشقه اعضاسی اهالیجه بالانتخاب تشكیل اولنان مجلسنك دخی وضع قوانینده رأیی منضم اولان و اوروپالیلرجه (دموقراتیك) دنیلان ویاخود وضع قوانین قوتی یالكز زادكان و معتبرانه منحصر بولنان و اوروپالیلرجه (اریستوغراتیك) تعبیر ایدیلن حكومته حكومت مشروطه. و محدود بر زمان ایچون اكثریت ارای اهالی ایله انتخاب اولنوب ریاست عنوانیله مقام قرالیده اوتوران حكمدارلرك حكومتنه حكومت جمهوریه دیرلر