حكمت عملیه — اوروپالیلرجه اجسامك و بلكه حیواناتك ماهیت و حقیقتندن بحث ایدن علمدر بو علم علوم طبیعیه+نك كافه+سنك غایتیدر موضوعی ماهیت و اسباب موجبۀ اصلیه+دن عبارت اولوب فكر و نظر و حقیقت نقطه+لرندن بالتدقیق قوۀ مفكره+نك اشیایه وقوفی و اشیانك كیفیت موجودیتی ماده+لرینی بیان ایدر بوده اوچ قسمه تقسیم اولنور برنجیسی (روح. اسباب موجبه . هیولی. بقا) دن بحث ایدر.
ایكنجیسی (طبیعت. ماده . قوت. امتداد. مسافه) دن بحث ایدوب فلسفۀ طبیعیه دنیلور. اوچنجیسی (آلهیات)دن بحث ایدر.
الان متداول اولان حكمت عملیه قواعدی سقراط عصرنده فلسفیاتك اوغرادیغی انقلاباتدن صكره یونانستانده ظهور ایدن مسلكلردن عبارت و بو مسلكلرك همان كافه+سی مؤدئ ضلالت اولدیغی حجةالاسلام امام محمدالغزالی علیه رحمةالباری حضرتلرینك رد احوال حكما ضمننده تألیف بیوردیغی اثار جلیله+لریله مثبتدر. قدمای حكمای اسلامیه تحسین افعال و اصلاح نفس و اعمال كندوریله استحصال اولنان (علم اخلاق) و (تدبیر مزنل) و (سیاست مدن) علملرینه حكمت عملیه دیدیلر.