حسین رضی الله عنه — ائمۀ اثنی عشرك اوچنجیسی و امام (علی) كرم الله وجهه حضرتلرینك فرزند عالیسی اولوب لقب شریفلری (سید) و (شهید)در. حضرت مشارالیه معاویه+نك وفاتیله یرینه اوغلی یزید پلید جلوس ایلدكده حقلری اولان خلافتی آلمق اوزره كوفه اهالیسنه مراجعت ایلمش و انلردن دخی اوچ بیك قدر آدم عرض بعتله ماعداسی كوفه+یه تشریف بیوردقلری حالده كافةً بیعت ایده+جكلرینی مشعر مكتوبلر كوندرمش ایدی. بناء علیه اللی التمش نفوس نجیبه+دن عبارت منسوبات جلیله+سیله قالقوب كوفه+یه توجه بیوردقلرنده یزید درعقب كیفیتی و طوته+جغی حركتی عراق والیسی عبید بن زیاده یازدی كوفه اهالیسی دخی بر مقتضای جبلت ویردكلری سوزی كیرو آلوب اول نور دو چشم نبوتی یالكز براقمغله ابن زیاد مؤخراً كربلا تسمیه قلنان (اسراق) نام محلده یتیشوب بر مدت دوام جنك و جدالدن صكره (٦٨٠ م و ٦١ ه) محرمنك اوننجی جمعه كوننده و اللی التی یاشلرنده مشار الیه حضرتلرینی اخذ و شهید و سر سعادتنی الای ایله شامه كوندروب بو وجهله قلوب موحدینه التیام قبول ایتمز بر یاره القا و تأبید ایلدی
بیت
سهل كاری نیست خون آل احمد ریختن
خاك غم بر فرق فرزند محمد ریختن
شهید مشار الیه حضرتلری (اشفق الاخوان دینك) كلام
حكمت اتسامیله لبكشای وعظ و نصیحت اولمشلردركه معناسی هر نقدر (اخوانك اشفقی دینكدر) دیمك ایسه ده اصل مراد حقیقیسی نجات دینه متابعت و هلاک مخالفتده اولدیغنی اشعاردر