حزقیا— قوم بهود حكمدارلرندن مشهور اخازك اوغلی و خلفیدر مومی الیه (٤٨٧٧ خ) تاریخنده یعنی میلادك یدی یوز یكرمی سنه مقدمنده جلوس ایله یكرمی طقوز ییل سلطنت سوردی و آثور ملكی (سناخریب) اون بر سنه صكره علیهنه قیام و هجوم ایتدكده مقاومت ایده+میه+جكنی اكلایوب بیت مقدسك قپولرنده موجود اولان اون بیك قیه كموش و بیك قیه التونی اعطا و آنكله دفع بلا ایلدیسه ده (سناخریب) مصری بعد التخریب ینه كلوب قدس شریفی شدتله تحت محاصرە+یه آلدیغندن (اشعیاء) علیه السلامك وقوعبولان دعاسی بركاتیله عسكری سنان جانستان طاعون ایله مطعون و كندیسی دخی كمال پریشانی و هزیمتله مندفع و مغبون اولدی. دیكر طرفدن ایسه مصرده براقدیغی اوردوسنه بر كیجه ایچنده فاره+لر مسلط اوله+رق عسكرینك یای كریشلرینی بتون قطع ایلدیكندن انلر دخی اورادن قطع رشتۀ امید ایدرك كیرویه دوندی.