حایق — اولاد (یافث)دن بر ذات اولوب ارمنی ملتنك جدی دیه طاننمشدر ارمنیلرك زعمنجه مرقوم بابل قله+سنك انشاسنده بولنوب بلوس) نامنده اولان رئیسلرینه اطاعت ایتمك ایستمیه+رك (٣٥٦٣ خ) یاخود (٣٢٢٩ خ) تاریخنده یعنی میلادك ایكیبك اوچیوز التمش بش سنه مقدمنده كندوسنه تبعیت ایدن اوچیوز نفر كیمسه ایله (نمرود) حكمنده بولنان ارض بابلی ترك و مسقط رأسی اولان ارمنستانه نقل و هجرت ایتمش و یرلولری تحت اطاعته آله+رق علی روایة كندو بنا كردە+سی اولان نخجوان شهرینی یاخود (آنی) بلدۀ جسیمه+سنی مقر حكومت اتخاذ ایلمش ایدی. مؤخراً مومی الیه (بلوس) ایله محاربه ایدرك طوتوب كندی الیله قتل ایلمشدر ارمنیلرك حایق و ارمنستانك حایقستان نامی بوندن قالمه+در. مومی الیهك امرای ملوك (اثوریه)دن اولدیغی و درتیوز سنه یشادیغی دخی مرویدر.