جهانكیری حسن افندی — مشاهیر مشایخ خلوتیه+دن قوۀ قدسیه صاحبی بر ذات ایدی. اصلی خرپوطلی اولوب درسعادتده رمضان افندیدن كسب فیض و معرفت و بروسه+ده یعقوب فانی حضرتلرندن استحصال خلافت ایدرك مرتبۀ قطبیته واصل اولمشدر. خلفاسندن فتحی امی حضرتلری سورۀ كوثردن یوقاریسنی بیلدیكی حالده اسرار مشكلات قرأنیه+یی حل و تذكار ایلر ایدی. (تحفة الطالبین و هدیة المسترشدین) صاحبی (نهجیء بهسنی) و چاملیجه لی (محمد) افندی دخی خلفاسندندر اشبو محمد افندینك اسكدارده چاوش دره+سنده ادریس افندی تكیه+سنده اولان قبرینه كیدوب روحانیتدن استمداد ایدنلر محروم دونمزلر. بو ادریس افندی مومی الیه محمد افندینك خلیفه سیدر. جهانكیری حسن افندی حضرتلرینك وفاتی (١٦٦٣ م و ١٠٧٤ ه) تاریخنددر.