جوهری — علم و معرفت و ذكا و فطنتده نادرۀ دوران بر ذات اولوب خصوصیله علم لغت و ادبده امام و مرجع علماء اعلام ایدی اسمی اسمعیل بن حماددر. سفری حضر اوزره اختیار و دائما دور بلاد و امصار ایدردی علم عربیتی عراقده ابی علی فارسی و سیرافیدن تحصیل ایتدكدن صكره حجازه كیدوب
اوراده عرب عاربه+دن بالمشافهه اخذ لغات ایلدی بعده خراسان طرفنه توجهله (دامغان) و بر مدت (نشابور) ده اقامت و تدریس ایدرك واصل دار آخرت اولدی. زمان وفاتی لایقیله معلوم اولمیوب (١٠٠٥ م و ٣٩٦ یاخود ٣٩٣ ویا ٤٠٠ ه) تاریخلری اولمق اوزره مختلف فیهدر. علم عروضده بر كتاب و نحوده بر مقدمه و لغتده (صحاح اللغة) نام كتابی تألیف ایلدی كه بونلردن صحاح حالا نامنه اوله+رق معروف و مشتهر و ایادیء اعتبار خواص و عوامده موجود و متدائردر اشبو كتاب حقنده اسمعیل بن عبدوس نیشابوری )هذا كتاب الصحاح سیدما - صنف قبل الصحاح فی الادب) )یشمل ابوابه ویجمع ما - فرق فی غیره من الكتب ) قطعه+سنی سویلمشدر.