) جبریه — افعال عباد بحثنده بر مذهب مخصوصدر كه (جبر مقلد) و (جبر محقق) ناملریله ایكی صنفه تقسیم اولنور (مقلد) صنفی معتزله+نك قول فعلنك خالقیدر دیدكارینه قارشو قول فعلنده مجبور یعنی عبد كندیسندن صادر اولان افعال و احوالك هیج برنده ذی مدخل اولمیوب خیر و شر هرنه و قوعبولورسه جمله+سی مقدرات ازلیۀ آلهیه دندر بناء علیه بشر یالكز بشریتنی طانیوب راحته باقملیدر دیه+رك انسانك اراده و اختیارینی و اوامر و تكالیف جناب پروردكاری كلیاً رد و انكارده و بو جهتله بهایم كبی بیابان دوزخ نشان نفس و هواده قالورلر. (محقق) صنفی ایسه امتثال اوامر و اجتناب مناهیدن صكره حقه تفویض امور ایله اسقاط اختیارده بولنورلركه بوكا (جبر متوسط) دخی دینور. امام علی كرم الله وجهه ورضی الله عنه حضرتلری بو بابده )لا جبر ولاتفویض و لكن امربین امرین) بیورمشلر و ائمۀ اهل سنتدن امام اشعری حضرتلری اشبو جبر متوسط مسلكنی قبول ایتمشلردر.