. جانبرد غزالی — ملوك چراكسۀ مصریه طرفندن منصوب شام والیسی ایكن سلطان سلیم خان اول حضرتلرینك مصر اوزرینه حركتنده سدراه اولمق عزمنده بولنه+رق حربه طوتشمش و بوزیلوب اسیر دوشدیكنه بناء پادشاه مشارالیهك حضورینه كتوریلوب بهادرلغنه حرمةً عفو و ینه شام والیلكنده ابقا بیورلمش ایدی. مرقوم ٥)( ١٥٢٠ م و ٩٢٧ ه) تاریخنده پادشاه نوجاه سلطان سلیمان قانونی حضرتلرینی امور ادارۀ دولتدن غافل و عاجز ظن ایدرك شامده اعلان استقلال و حلبك ضبطنی استعجال ایتمكله فرهاد پاشا قومانداسی تحتنده بر فرقه عسكر سوق اولنوب اولاً خارج شامده مصطبه نام محلده جمعیتی تارمار و ثانیاً سید علی نامنده بر آدمی یدیله كله+سی كسدیریله+رك غائله+سی بر طرف ایدلمشدر.