ابو العلء المعری احمد بن عبدالله — ادبای امتدندر. بونك
علم شعر و معانی و بیانده اولان مهارتی و قوۀ حافظه+سی همان امثالسز كبی
اولوب بعض كمسه+لر اعتقادنده شبهه ایدرلر و بعضیلری حسن ظن
ایلرلر ایدی. مومی الیه كشی نفسی ایچون حیوانی ذبح و ازعاح و وجودینی
افنا ایتمك لایق دكلدر دیه+رك قرق بش سنه حیوان اتی ییمامشدر و حال
صباوتندنبرو ایكی كوزی اعما اولدیغی حالده هر قنغی بر كتابدن اولورایسه
اولسون یكرمی صحیفه قدر محلی حضورنده بر دفعه قرائت اولنسه درحال حفظ
ایدوب بر یاكلشسز اوقودیغی چوق كره تجربه اولنمشدر. بونی بر كره
شیوعبولان شهرتنه بناء بغداده جلب ایتمشلر ایدی یولده كیدركن رفاقتنده
بولنان تاتار (افندی اغاج التندن کچه+یورز باشنی ازاجق اشاغی اك)
دیمسیله ابو العلاء باشنی اكوب او موقعه نشان قودی و بر قاچ ای صكره
عودت ایدركن او موقعه كلدكده همان باشنی اشاغی اكوب رفقاسنی
حیرتده براقدی
بر دفعه دخی قیون صاتان اوچ كردك جامع شریفده شركت حسابندن
طولایی منازعه ایتدكلرنی ابو العلاء اوزاقدن دکله+یوب عربجه+دن ماعدا
بر لسانا واقف اولمدغی حالده کردجه اولان سوزلرینی بللر و کردلر دعوالرینی بینلرنده فصل ایده+میوب محكمه+یه كیتدكلرنده حاكم افندی برینك اقرارینه شاهد استر و كردلر دخی بولندیغمز محلده اوچمزدن ماعدا كمسه یوغیدی فقط شو قیافتده بر اعما كنارده نماز قیلمقده ایدی دیملریله حاكم ابو العلاء اولدیغنی حس ایدرك چاغیروب بونلر اوراده بربرلرینه نه دیدیلر دیو سؤال ایلدكده ابو العلاء بن بونلرك لساننی بیلمم فقط شو صدانك صاحبی شویله سویلدی و او بری بویله دیدی دیه+رك جمله+سنك افاده+سنی تقریر ایلر و او تقریری ترجمه اولنه+رق كردلرك افاده+سی میدانه چیقار و ایجاب شرعیسی اجرا اولنور وفاتی (١٠٥٧ م و ٤٩٩ ه) تاریخنده+در و خیلی تصنیقاتی و بر دیوانی واردر