ثوابت — جوسماده اولان اجرام مضیئه+نك بینلرنده+كی ابعاد
و اوضاع دكشمیه+رك سكون حالنده كوریلان و پك تدریجی اولە+رق حركات مخصوصه+لریله دور ایلیان قسم اعظمنه دنیلور و بونلره حركات یومیۀ عمومیه+لرندن بشقه بر حركه ایله متأثر اولوب اولمدقلری هنوز كشف اولنه+مدیغندن (ثوابت) نامی ویریلور. اشبو ثوابت ایكی قسم اولوب بر قسمی آلات رصدیه استعمال اولنمیه+رق كوریلانلر و دیكر قسمی آلات رصدیه ایله مرئی اولانلردر و آلاتسز كوریلنلرك عددی التی بیكه طوغری واردیرلمش ایسه ده الات ایله كوریلانلرك عددی معلوم دكلدر نته كیم مشهور راصدلردن (ستروو) یكرمی قدملك بر تلسقوپ ایله یكرمی ملیون قدر (ثوابت) تعداد ایتدی و (شاقورناق) نام ذات اون دردنجی قدره قدر سكسان ملیون ثوابت رؤیت ایدیله+جكنی بیلدیردی. الاتسز كوریلان ثوابت لمعان و جسامتلرینه كوره یدی قدره قدر تفریق و آلات ایله كوریلان ثوابت یدنجی قدردن اون یدنجی قدره قدر تقسیم اولنمشدر. یكرمی دانه+دن عبارت اولان قدر اول كواكبنك برنجیسی (شعرای یمانی) و التمش دانه+دن عبارت اولان قدر ثانی كواكبنك اك مشهوری (منكب الجوزا)در و قدر ثالث كواكبی (٢٠٠) و رابع (٤٢٥) و خامس ( ١٤٠٠) و سادس (٣٢٠٠) و سابع (١٣٠٠٠) و ثامن (٤٠٠٠٠) وتاسع (١٤٢٠٠٠) الی آخره تخمین اولنمشلردر.