تیمورلنك — تركستان پادشاهلرندندر. تركستانده سمرقند جوارنده واقع كاش شهرنده دنیایه كلوب سلالۀ جنكیزیه+دن طوغلق شاهه قرابتی مناسبتیله بلخ والیسی اولدی ومومی الیهك وفاتندن صكره باجناحی یاخود قائن پدری امیر حسین ایله برلشه+رك (١٣٦٣ م و ٧٦٥ ه) تاریخنده مومی الیهك اوغلنی حرباً اخذ و قتل و یرینه سلالۀ مذكوره+یه منسوب حمقادن برینی اقعاد ایدرك نفوذ دولتی
ید اقتدارلرینه الدیلر و بر مدت صكره تیمورلنك امیر حسینی دخی محاربات کثیره ایله دپه+لیوب (١٣٧٠ م و ٧٧٢ ه) تاریخنده بلخده استقلالنی اعلان ایلدی و بر ارە+لق (خوارزم) و سمرقند و كاشغری دخی آلوب (١٣٧٦ م و ٧٧٨ ه) تاریخنده پای تختنی بلخدن سمرقنده كتوردی و بحر حززك جهت شرقیسنده بولنان خانلرك كافه+سنی و تاتارستان حكمداری (تیمور ١ ملك) ك ممالكنی ضبط و ملك مومی الیهی قتل ایلدی و مؤخراً ممالك ایرانیه+یی و روسیه+نك جهت جنوبیسنی و اراق حوالیسنی برقاچ سنه ظرفنده خراب و یغما ایتدكدن و (سرخس) و (فوشخ) شهرلری اهالیسنی قتل عام ایدوب قندهار و سیستان اهالیسنی دیری دیری یره كومدكدنصكره احمد جلایرینك بغدادده تداركات اوزره اولدیغنی ایشیدوب اورایه دخی یتشدی و مومی الیه مصره فرار ایلدیكی جهتله بغداد اهالیسنه شرابلری دوكدیروب برچوق امر و نهی اجرا ایتدی و كسدیكی طقسان بیك بغدادلینك باشلریله بر علامت ركز ایلدی و علما و مشاهیردن خیلی آدم آییروب سمرقنده كوندردی و (١٣٩٧ م و ٨٠٠ ه) تاریخنده همالایه طاغلرینی آشه+رق هندستانه كیدوب دهلینك دیوارلری دینده محمود شاه رابع ایله غایت خونریزانه بر محاربه+دن صكره باشدن باشه هندستانی دخی قبضۀ تسخیره الدی و النه کچن اسیرلردن یوز بیك كشی+یی اظهار عظمت ایچون ذبح ایتدیردی و (١٤٠٠ م و ٨٠٣ ه) تاریخنده احمد جلایری+یی آلمق اوزره مصره توجه و حلب صحراسنده واقع (مرج دابق) نام محلده حلب و شام عسكرینی و متعاقباً مصر حكمدارینك حما و حمصده+كی بیوك اردوسنی بوزوب و شام شریفی تخریب و استیلا ایدوب عسكرینه هردرلو افعال شنیعه اجرا ایتمك اوزره رخصت ویردی و احمد جلایری مصردن سلطان )بایزید اول) حضرتلرینه التجا ایتمسی اوزرینه مومی الیهی سلطان مشارالیهدن استه+یوب ویرمدیكیچون (١٤٠١ م و ٨٠٤ ه) انقره+ده انكله دخی ًدوكوشدی و عساكر عثمانیه بعض اغفالاته قاپیله+رق خیانت ایتدیكنه بناء سلطان مشار الیه اسیر اولدی و تیمورلنك آیدین ولایتنه اینه+رك ازمیر و ادرمیدی قوالیرلردن الدقدن صكره اظهار عصیان ایدن كرجستان اهالیسنی تأدیب ایدرك پای تختی اولان سمرقنده واردی و (١٤٠٤ م
و ٨٠٧ ه) تاریخنده نفیر عامدن بشقه علوفه+لی اوله+رق یازمش اولدیغی ایكیوز بیك سواری ایله چینه طوغری كیدركن (سیحون) جوارنده وفات ایتمكله نعشی سمرقنده كتورلدی. مرقوم طوپال اولدیغی جهتله تیمورلنك نامیله شهرت بولمش ایسه ده اصل اسمی (تیمور كوركان)در و كوركان داماد معناسنه+در. مرقومك سرخس و فوشخ و قندهار و سیستان و اصفهان و بغداد و سیواس و سائر ممالكده قتل عام ایله تلف ایتدیكی نفوسك مقداری ایكی ملیونی و محاربه+لرده ایكی طرفدن تلف ایتدیكی آدملرك مقداری اوچ ملیونی متجاوزدر