تیمور طاش پاشا — غازی خداوندكار حضرتلری مشاهیر امراسندن اولوب تنظیم عسكر و تدبیر مصالح حضر و سفر خصوصلرنده ید طولا کوسترمشدر غازیء مشار الیه زماننده و مخدومی ییلدیرم بایزید خان حضرتلری اواننده روم ایلی بكلر بكیسی اولوب یكیجه و یانبولی+یی و ارنودلغك و صربیه+نك خیلی محللرینی فتح ایتدی و صرب قرالینك كندینی پادشاهك دائرۀ اطاعت و عبودیتنه ادخال و قرال مومی الیهك
همشیره+سی (ملیچا)یی حرمسرای همایونه قبول ایتدیردی بر ارالق مأموراً انقرە+ده بولندیغی صرە+ده قرمان اوغلی علی بك پاشای مشار الیهی بغتةً باصوب اسیر ایتمش ایسه ده مؤخراً اسارتدن قورتلدیغنده فرقه+سیله واروب اوده علی بكی طوتمش و فقط صاغ براقمیوب اولدرمشدر. تیمور طاش پاشانك (یخشی بك) نامنده اولان اوغلی دخی نامداران امرای عثمانیه+دن اولوب بو دخی پك چوق حروب و مغازیده قوماندانلقده بولنمش و حتی ییلدیرم خان حضرتلرینك استانبول محاصره+سنه توجهنده طلیعه قوماندانلغیله بحر سیاه بوغازینه قدر كلوب پك چوق محللر فتح اتمش ایدی.