تیت لیو — قدمای مورخیدندر (٥٥٣٥ خ) تاریخنده یعنی میلادك اللی طقوز سنه مقدمنده دنیایه کلوب (١٩ م) تاریخنده وفات ایلمشدر. بو ذات ایمپراطور (اوكوست)ك اوغلنه خواجه اولدیغی حالده رومانك ابتدای تأسیسندن كندو زماننه قدر و قوعاتنی مبین یوز قرق جلدی جامع بر تاریخ قلمه آلمشدركه شمدی انجق اوتوز بشی موجوددر مندرجاتی غایت لطیف و موشكافانه و افاداتی درست و بی طرفانه و باخصوص حاوی اولدیغی نطقلر نوادردن معدود اولدیغنه بناءً اوروپاجه پك معتبر طوتلمقده+در.