لغات تاریخیه و جغرافیه

Lugat-ı Tarihiyye ve Coğrafiyye

تنه+سه

Tenese

تنه+سه — امریقای وسطی حكومات مجتمعه+سندن بریدر. شمالاً (كنتوكی) شمال شرقیده (ویرژینی) شرقاً (شمالی قارولین) جنوب شرقیده (ژورژی) جنوباً (الاباما) غرباً (میسیسپی) ایله تحدید اولنور طولاً غربدن شرقه ٧٥٠ و عرضاً شمالدن جنوبه ١٩٥ كیلو مترو وسعتی و ایكی یوز التمش یدی بیكی اسیر اولمق اوزره بر ملیون یوز اون بیك نفوسی حاوی اولوب مقر اداره+سی (ناشویل) شهریدر هواسی صاغلام و معتدل واراضیسی علی الاطلاق محصولداردر محصولات طبیعیه+سندن اولارق قامش شكری پموق توتون مصر و بغدای یتشدیرر +كرك حیوانات مأنوسه و كرك حیوانات وحشیه سی غایت چوقدر وقتیله كلیتلی اولان (شروكی) نام یرلی اهالی الیوم جنوب شرقیسنده بولنور ابنیۀ قدیمه+سنك خرابه زارلری ایچنده (فورقددیره) قریب ٥١ مترو ارتفاعنده بر اهرام موجوددر. تنه+سه (١٧٩٠ م و ١٢٠٥ ه) تاریخنه دكین (قارولین)ه ملحق بولندیغی حالده مؤخراً آیریلوب ١٧٩٧ سنه+سی حكومت عنوانیله امریقا اتحادینه داخل اولدی. ١٨٦١ده مفارقت سیاسیه+یی دعوت ایدن دولتلرك اتفاقنه دخی كیرمشیدی. بو حكومتك هیئت قانونیه+سی یكرمی بش اعضادن مرتب بر سناتودركه جمله+سی ایكی سنه ایچون منتخب اولمق اوزره یتمش بش اعضادن مركب بر هیئت مبعوثاندن عبارتدر ایكی سنه ایچون منتخب اولان بر والی+یه قوۀ تنفیذیه اعطا ایدیلور هر فرد بیاض و حر اولدیغی حالده ناخب و منتخب صفتنی حائزدر.