آپامینونداس — یونانستانده (تب) یاخود (تیوه) جمهوری
قدما و اركانندن بر مشهور جنرالدر. بولندیغی محاربه+لرده هیج مغلوبیت كورمیان اشبو قهرمان (٣٤٧٢ خ) تاریخنده یعنی میلادك ایكبیك یوز یكرمی ایكی سنه مقدمنده اسپارت جمهوریله ایتدیكی محاربه+ده بر آغر یاره آلدیغندن قوماندایی براغوب سودیكی ضابطانی جادرینه جلب و مظفریت كندو طرفلرنده واقع اولدیغنی بالتحقیق اظهار ممنونیت ایتدكدنصكره قارشوسنده اصیلی اولان قالقان و قلیجنه اشارت ایدرك (بن شمدی+یه قدر شو سلاحلرم سایه+سنده اصلا مغلوب اولمقسزین كیدە+یورم بوكون بنم آخر عمرم ظن اولنمسون زیرا شرف و اقبالم بوكون احتمال تغیردن قورتیله+جق یعنی نام قهرمانلقله قاله+جقدر اشته سزه تیوه+یی مظفر و اسپارتی مقهور و مدمر براغیورم بونلر بنم نام و شجاعتمی ابداً اونوتدیرمزلر) دیوب و اولادی اولمدیغنه تأسفله بر آه چكوب آخرته كتدی. بو قهرمان همان بالجمله فضائلی جامع و وطن و ملتنه فوق الغایه محب اولدیغی و هركسك خشنودیتنی قزاندیغی حالده ینه غرض و نفسانیتدن قورتیله+مامش و مقدما وقوعبولان بر محاربه+یی نیچون درت آی قدر اوزاتدك دیو اعدامنه حكم اولنمش و كوجله یقایی قورتاره+بیلمش ایدی.