تفلیس — روسیه+ده كرجستان و قافقاسیه ولایتنك مركزیدر (كر) یاخود (قور) نهری شهرك اورته سندن جریان ایدر و اهالیسی اوتوز بیك تخمین اولنور (١٨٣٠ م و ١٢٤٦ ه) تاریخندن اول دها زیاده اولدیغی حالده ظهور ایدن وبا علتی ثلثاننی تلف ایتمشیدی بوراده روم و ارمنیلرك اسقف دائره+لری و محكمه+لری و بر ارمنی مكتبی واردر و تجارتی اپیجه ایلرولمشدر و خارجنده ایلیجه اولدیغندن سبجاق مملكت معناسنه اوله+رق تفلیس نامی ویرلمشدر بوراسی طقوزنجی عصر میلادیده كسب اهمیت ایلدیكندن كرجستان خانلری مقر حكومت اتخاذ ایلدی و اون ایكنجی عصر میلادیده جنكیز خان خیلی یرلرینی خراب ایتدی (١٥٧٦ م و ٩٨٤ ه) تاریخنده دولت علیه طرفندن (لالا مصطفی پاشا) قومانداسیله كوندریلان عساكر عثمانیه عجملرله ایتدیکی چلدیر محاربه+سنی قزاندیغنی متعاقب كرجستان خانی كنج (منوجهر) یاخود سیمون كوردیكی تضییق اوزرینه والده+سنك اخطاریله و برادری (غورغور) ایله اردوی همایونه كلوب اسلامی قبول و سنوی یوز بیك دینار ویره+جكنی تعهد و اوغلنی رهن اعطا و حمایۀ دولت علیه+یی
رجا ایلدیكندن بالموافقه ملكی اولان تفلیس و شكی و ارش و شماخی و تیمور قپو كندوسنه ترك اولندی و (١٧٩٥ م و ١٢١٠ ه) تاریخنده ایران شاهی (اغا محمد خان) تخریب و استیلا ایتدی و (١٧٩٩ م و ١٢١٤ ه) تاریخنده روسیه كرجستانده اویغونسزلق وار اهالی روسیه تابعیتنی استه+یور دیه+رك بیمحابا تفلیسه كیروب تصرفنی اعلان ایلدی و بو صورتله دولت علیه حمایه+سندن چیقدی.
تفلیس اهالیسنك برازی مسلماندر و بر جامعلری واردر.