تصفیه — كیمیاده لون و طعم و رایحه+سی تغیر و تعفن ایتمش اولان ویاخود مواد اجنبیه ایله مخلوط بولنان مایعاتی (صافیت) حالنه ارجاع ایتمكه دیرلر و بونك هربرینی قواعد مخصوصه+سی اوزره بر بشقه یولده یپارلر مثلا لون و طعم و رایحه+سی تغیر و تعفن ایتمش اولان بر صویك شرب و استعمالی لازمكلدكده فخم عضوی یعنی حیواناتك قول و بجاق و بوینوز مثللوكمیكلرینك قپالی یرده یاقلمش اولان كموری بر فوچی ویا واریل ایچنه مسحوقاً وضع اولنوب مذكور صو اوزرندن دوكلدیکی حالده اشاغیسندن صیزوب آقان صویك لون و طعم و لذتی صافیت حالنی الدیغی مشاهده اولنور و ینه مواد اجنبیه قاریشق اولان زیتون یاغی سوزكی كاغدندن سوزلمكله یاخود قینار صو ایله برقاچ دفعه یقانمغله تصفیه ایدیلور.
و قیون قویروغی قباجه قیمه كبی قییلوب و عادی صو ایله براز قینادیلوب صغودقدن صكره اوزرنده تصلب ایدن یاغ اخذ اولنسه طعمنی آغرلشدیران حم رایحه+سی و مواد غلیظۀ سائرە+سی صویه آیریله+جغندن لطافت كسب ایدر. اشبو تصفیه علمی فن كیمیا و معادنده دخی حائز اهمیتدر.