تسالیا — شمدی ترحاله دنیلان مملكت اولوب وقتیله جهت شمالیسی ماكیدونیا و جهت جنوبیسی خصوصی یونانستان و اولیمپ طاغلری و اق دكز ایله محدود بر ولایت جسیمه و مركزی (لاریسه) ایدی ابتدا (همونی) نامی ویریلوب صكره بر طاقم وحشی غاصبلرك زیر تصرفنه كچدی و مشهور (دوقالیون) میلاد عیسی علیه السلامدن بیك بشیوز سنه مقدمنه یقین زمانده بوراده بر مدت اجرای حكومت ایتدی و ماكیدونیا حكمداری فلیب (تب)ده ظهور ایدن منازعاتی وسیله ایدرك (٥٢٥٦ خ) تاریخنده یعنی میلادك اوچیوز اوتوز سكز سنه مقدمنده كیدوب تسالیایی حرباً ضبط ایلدی و یوز طقسان سنه صكره ماكیدونیا ایله برابر رومالولر طرفندن ضبط اولندی.