تریسته — اوستریا دولتنك وندیك كورفزی داخلنده و ویانه+نك جنوب غربیسندن بشیوز اللی كیلو مترو بعدده بر معتبر و تجارتكاه شهریدر و پورتو فرانق لیمانی غایت امین و واسعدر و محتویاتیله برابر اهالیسی یوز بشبیك نفوسدن عبارتدر وفنون بحریه وسائره تحصیلی ایچون مكتبلر و كتبخانه+لر و موزه+خانه+لر و روم و قتولك اپسقپوسلری واردر.
بشنجی عصر میلادیده ایمپراطور (اوكوست) تریسته+نك اطرافنه بر سور چكدیسه ده معهود (آتیللا) براقمدی (١٧١٩ م و ١١٣٢ ه) تاریخنده التنجی (شارل) شهرك سربستیء احوالنی اعلان ایلدی بناء علیه هر قنغی ملت و تبعه+دن اولور ایسه اولسون استه+یان كیدوب مكتب و معابد وسائره بنا و تصرف ایده+بیلور و اخراجات و ادخالاتی هر درلو رسوماتدن معاف طوتیلور حتی ارمنیلرك و یهودیلرك بیله فنون و تجارت مكتبلری واردر. بوراسی پورتو فرانق اولمزدن اول التی بیك نفوسی جامع بر كوچك مملكت ایدی شمدی اون سكز قاتنه وارمشدر اسكی اسمی (تركسته).