ترك — یافث بن نوح علیه السلامك برنجی اوغلنك اسمیدر
و بوكا منسوب اولوب حین تفرقده تركستان چینینك جهت شمالیسنه و قالموقستانده واقع (اسی كول) حوالیسنه و مؤخراً هندستان ممالكنه یایلمش اولان اقوامه دخی (ترك) تسمیه اولنمشدر
بونلر بیان اولنان محللرده نیجه زمانلر كندو رئیسلرینك و بعضاً تشكیل ایتدكلری حكومتلرك امری التنده یشایوب بعضاً دخی چین و هند حكمدارلرینه انقیاده مجبور و بر چوق شعباته منقسم اولدیلر و اوننجی عصر میلادیده كندولرینه قارشمش و حمایه+لرینی قبول ایتمش اولان قبائل متعددۀ سائره ایله برابر ایران و آسیای صغرا طرفلرینه كلوب كاه صلحاً و كاه حرباً یرلشدیلر و فتح ایتدكلری ممالكده توطن و تمیزلری ایجابنجه دخی بر چوق شعبە+لره انقسام و حكومات تشكیل ایلدیلر. اك مشهورلری (غزنویلر) (سلچوقیلر) (دولت عثمانیه)در و بونلردن دخی پك چوق سلالۀ حكمرانی تشعب ایتمشدر
الحالة هذه موجود اولان اقوام تركیه+نك برنجیسی عثمانلیلر ایكنجیسی ایران و افغانستان و تركستانده بولنان تركمانلر اوچنجیسی سبیریاده اولان تورانیلر و تاتارلر دردنجیسی تركستان كبیرده اجرای نفوذ ایدن قبیله+لر و اوزبكلر بشنجیسی قزاقلر و پارتیلره منقسم اولان قرقیزلر التنجیسی یاقوتلر ایله جوواشلردر