لغات تاریخیه و جغرافیه

Lugat-ı Tarihiyye ve Coğrafiyye

ترسانه

ترسانه — سفاین حربیه انشا اولنان محل معناسنده مستعمل بر اسمدر. فتحدن صكره درسعادتده سفاین حربیه قادرغه لیمانی دنیلان یرده انشا اولنور ایكن بیوك سفینه+لر انشاسی اقتضا ایلدیكندن دستكاهلر یالی كوشكنه نقل ایدلمش ایدی بوراده بالاكمال دكزه ایندیرلمكده اولان اوچبیك فوچیلق بر قالیونك موقعك مناسبتسزلیکی جهتیله قیزاقدن دوشوب شكست اولمسی مناسبتیله بورانك دخی الویرشلی اولمدیغی اكلاشلدیغندن دستكاهلر اسرای حربیە+نك ضبط و توقیفنه مخصوص اولمق اوزره مقدمجه قاسم پاشا ساحه+سنده بنا اولنمش اولان زندانك اوكنه نقل اولندی و ذكر اولنان زندانك اولوقت اسمی (ترسا خانه) اولدیغندن سفینه+لرك یاپلدیغی محله دخی بر مدت ترسا خانه اوكی دنیلوب صكره بالتخفیف (ترسانه) نامی شهرت بولدی. بعض كتب تواریخده عربلرك كمی یاپیلان محله دار الصناعه تسمیه ایتدكلری و ترسانە+نك بوندن مأخوذ و محرف ایدوكی محرر ایسه ده صحیح دكلدر زیرا عربلرجه کمی یاپیلان محله قویمق ایچون (مرسی) كلمه+سی موجود و مستعملدر حتی اندلسده مؤخراً ایالت اسمی اولان (مرسیه) نامی دخی اورانك دها اول سفینه انشاسنه تخصیصی مناسبتیله ویرلمشیدی