تراسیا — روم ایلینك شمال شرقیسندن عبارت اولان طونه و قره دكز و بوغاز ایچی و یونان و مرمره دكزی و ردوب طاغلری ایله محدود اراضیء وسیعه+نک اسمیدر. بوراسی اك اسكی زمانده بر طاقم وحشی كوچلرایله مسكون اولوب ایچلرنده شجاعتلو جنكجیلر و دواملو سرخوشلر چیقار و زراعت و تجارت كاملاً مفقود اولدیغی جهتله اهالیسی نهب و غارت و حیوانات ایله تعیش ایدر ایدی. صكره شمال طرفندن كلوب طونه نهرینی تجاوز و اهالیء قدیمۀ مرقومه+یه التحاق ایدن اقوامك اولدقجه غیرت و همیتله تراسیا ایركندن معمور اولمغه باشلادی و میلاددن بش عصر اول تراسیانك بر قسمی عجملره و صكره بعض طوائف ملوكه مال اولوب ماكیدونیا قرالی فلیب و اوغلی اسكندر زمانلرنده ماكیدونیا حمایه+سی التنده قالدی و اسكندرك وفاتنده ممالكی تقسیم اولندیغی زمان تراسیا دخی لیزیماقه و متعاقباً رقیبی سلفقوسه و میلاددن ٣٨١ سنه مقدم (پتولە+مه)یه كچدی و نهایت (٤٦ م) تاریخنده روما دولتنه انتقال ایدوب انده تقرر ایلدی و دها صكره یونانیلر و بعض مستقل پرنسلر اداره ایدوب (١٣٥٦ م و ٧٥٨ ه) تاریخنده دولت علیه ادارە+سنه كچمكه باشلادی