لغات تاریخیه و جغرافیه

Lugat-ı Tarihiyye ve Coğrafiyye

ابا مسلم

Ebû Müslim

ابا مسلم — اسمی (عبدالرحمن) مولدی (خراسان) تاریخ وفاتی (٧٥٤ م و ١٣٧ ه) دولت امویه+یی محو و دولت عباسیه+یی تشكیله سبب اولان ذاتدر بو ذات احاد ناسدن ایكن (مرو) شهرنده ساكن اولاد عباسدن امام ابراهیمك نقباسنه انتساب ایدرك انلر طرفندن قرا و قصباتی طولاشوب اهالی+یی امام مومی الیهه بیعت ایچون تشویقه مأمور اولدی و ایفای مأموریت ایتمكده ایكن ملوك امویه+دن مروان الحماری كیفیتی خبر الوب مأمور مخصوص ارسالیله امام مومی الیهی اعدام ایتدیردیسه ده ابا مسلمی ایشندن الیقویه+مدی و ابا مسلم درحال دعوتی متوفای مومی الیهك حیره+ده محتفی بولنان برادری (ابو العباس سفاح) نامنه چویروب و طوپلادیغی عساكر كلیه ایله خراسانی اوروب مروان الحماری طرفندن اوتوران والی+یی قاچیردی و اول اثناده (سفاح) دخی حیرە+دن انباره كلوب هركس بیعت ایتدی و ابا مسلمك اردوسی (زاب) نهری جوارنده شام عسكرینی بوزدی و مروان الحماری شام شریفه و اوراده دخی طوره+میوب داها كیرولره فرار ایلدیكندن (سفاح) (٧٤٩ م و ١٣٢ ه) تاریخنده سلطنتنی اعلان ایلدی ابا مسلم بو خدمتنه مكافات اولمق اوزره خراسان والیلكنی احراز ایلمشسه ده بش سنه+دن زیاده معمر اولمامش و عاقبت خلیفه منصورك سیف غدریله اعدام اولنوب غوغای جهاندن قورتلمشدر. (ابو العباس و مروان) كلمه+لرینه دخی مراجعت بیوریله .