تبوك — مدینۀ منوره ایله شام شریف آره+سنده و مداین صالح جوارنده بر موقعك اسمیدر. (٦٢٠ م و ٩ ه) تاریخنده علیه الصلاة والسلام افندمز روملرك شام شریفده اسلام علیهنه تداركاتده. بولندقلرینی ایشیدوب هوانك غایت سیجاق بر زماننده اون بیكی سواری اولمق اوزره اوتوز یاخود قرق بیك عسكر ایله موقع مزبوره تشریف بیوردی لكن روملردن وزیر حمایه+لرنده اولان غسانیلردن بر حركت متقابله ظهور ایتمدیکی و (ایله) حاکمی و (جرما) و (اذرج) قبیله+لری ویركو ویرمك اوزره عرض انقیاد ایلدیكی و (دومة الجندل) حاكمی (اكیدر)ك اوزرینه درتیوز قرق سواری ایله كوندریلان (خالد بن ولید) حضرتلری مرقوم اكیدری آوده آولایوب حضور سعادته كتوردكده او دخی عرض انقیاد و ایكی بیک دوه و سكز یوز آت و درت یوز زره اعطاسیله
عقد مصالحە+یه مجبور اولدیغی جهتلرله محاربه وقوعبولمدی فقط بو قدر عسكرك مأمول اولمیان بر زمانده شام حدودینه قدر كلیویرمسی ملوك متجاورە+یه بر بیوك دهشت ویردی و شوكت اسلامیه اوزاق یقین هر طرفه منتشر اولدی.
اشبو غزاده علیه الصلاة والسلام افندمز كیدیلە+جك محلك اوزاق و یوللر سیجاق و قحط و غلا محقق اولدیغندن لوازمات سفریە+نك لایقیله تداركنی فرمان بیوردیغی جهتله هركس قدرتنه كوره برر مقدار شی ویرمش و بعضیلری مالنك ربعنی و بعضیلری ثلث و نصفنی اورته+یه قویمش ایدی (ابی بكر الصدیق) رضی الله عنه حضرتلری دخی مالنك تمامنی )و حضرت عثمان) رضی الله عنه حضرتلری تجارت ضمننده شامه كوندرمك اوزره بولندیغی ایكی یوز دوه ایله سرمایه اولمق اوزره آیردیغی ایكی یوز قیه التونی اعطا ایلمشدر. (همتی اكلاملی) موقع مزبوره (عاصی حرما) دخی دیرلر.