تبریز — ممالك ایرانیه+دن اولان اذربایجان ولایتك مرکز اداره+سیدر. بو شهر مقدما بر قریه ایكن (٧٩٢ م و ١٧٢ ه) تاریخنده خلفای عباسیە+دن هارون الرشیدك زوجە+سی سیده (زبیده) حضرتلری بو قریه+ده تبدیل هوا ایدرك ستمه خسته+لغندن قورتلدیغی جهتله آب
و هواسنی تقدیر توسیع و فارسیجه ستمه دوکیجی معناسنه اولە+رق تبریر تسمیه ایلدی و مشار الیهانك تشویق و رغبتی و آب و هواسنك لطافتی مناسبتیله آز وقت ایچنده پك چوق علما و فضلا و بشیوز بیك قدر اهالی جمع اولدی و مؤخراً مغوللرك و تاتارلرك بالدفعات هجومی و بعضی مظالم و تعدیاتك وقوعی سببیله اهالئ مرقومه طاغیلوب شمدی یوز قرق بیكه تنزل ایتدی. (١٥١٤ م و ٩٢٠ ه) تاریخنده سلطان (سلیم) حضرتلری یوز قرق بیك عسكر ایله كیدوب تبریز جوارنده واقع چالدران صحراسنده عجملر ایله چارپیشوب محاربه+یی قزاندقدن صكره شاه اسماعیلك برنجی زوجه+سی ایله معشوقه+سی تاجلی خانمه وارنجه+یه قدر خزینه و اشیاسنی اغتنام ایلدی و (١٧٢١ م و ١١٣٤ ه) تاریخنده وقوع بولان حركت ارضدن تبریزك بر جهتی خراب اولوب اهالیدن یكرمی بشبك قدری ابنیه التنده تلف اولدی و اون درت سنه صكره دولت علیه ایكنجی دفعه اوله+رق ینه ضبط ایدوب قلعه+سنی هدم ایتدی. تبریزده اوزون حسنك و جهان شاهك جوامع شریفە+سی اثار عتیقە+دن اولمق اوزره حالا موجوددر. و بغچه+لری و میوه+سی چوقدر و خارج و داخلنده پك چوق بیوك ذوات مدفوندر