تئودریق — شرق ایمپراطورینك رضاسیله ممالك شرقیە+ده توطن ایدن استروغوت قومنك رئیسی اولان (تئودمیر)ك اوغلیدر.
بو چوجق سکز یاشنده ایكن پدری طرفندن استانبوله رهن اولە+رق كوندرلمش و بو مناسبتله تحصیل علوم ایدرك مدنیت نه اولدیغنی اوكرنمش و پدرینك وفاتندن صكره (٤٧٢ م) تاریخنده كیدوب پدرینك مقامنه اوتورمش ایدی ایچراطور زنونك خلعندن صكره ابقاسنه معاونتی سبق ایلدیكندن مكافاةً حدود سرعسكرلكنه نائل اولدی و اون بر سنه مقدم روما دولتنی محو و ایتالیایی غصب ایدن (هرول) طائفه+سی اوزرینه (٤٨٧ یاخود ٤٩٣ م) تاریخنده سفر آچوب عساكر ایمپراطوریه ایله برابر ایتالیایی قورتاردی وطائفۀ مرقومه+نك رئیسی بولنان (اودواقر)ی سچلیاده محاصره و امان ایله اخذ ایدوب برقاچ كون صكره بر ضیافتده اعدام ایتدی و ایتالیاده كندو نامنه بر یکی قرالیت تشكیل ایله فرانقلری و باویرالولری تحت اطاعته آلدی لكن آخر وقتنه طوغری بر طاقم اوهامه تابع اولە+رق بعض خیرخواهلرینی خیانتله اتهام و بغیر حق اعدام ایتمك و صكره خیانتلری اولمدیغنی اوكرنە+رك ندامت ایلمك و نیچون ایتدم دیو قوروب طورمق كبی اویغونسز حاللر ایچنده براز مدت یشایوب مسلوب الشعور اولدیغی حالده (٥٢٦ م) تاریخنده وفات ایلدی بونك مقر سلطنتی ایتالیاده (ناربون) شهری ایدی. اسپانیا ویزیغوتلرینک قرالی اولوب (٤٢٦ م) تاریخندن (٤٣٦ م) تاریخنه قدر رومالولرله اوچ دفعه محاربه ایدن برنجی (تئودریق) و مومی الیهك اوغلی و خلفی ایكنجی ( تئودریق) بشقه+در