لغات تاریخیه و جغرافیه

Lugat-ı Tarihiyye ve Coğrafiyye

پیتر / پترو

Peter / Petro

پیتر یاخود (پترو) — متعصبین نصارادن بر پاپاسك اسمیدر. بو پاپاس اصلزادكاندن اولدیغی حالده بر آرە+لق عسكره كیروب صكره یعنی (١٠٩٣ م و ٤٨٦ ه) تاریخنده پاپاسلغه یاتدی و زیارت ایچون قدس شریفه كیدوب عودتنده قدس شریف پطریقندن پاپا ایكنجی (روپەن)ه شرق خرستیانلری غایت اذا و جفادە+در و حضرت عیسی علیه السلامك مقامی تحقیر ایدلمكده+در مألنده مؤثر بر مكتوب كتوروب شفاهاً دخی بر طاقم یالانلر سویلدیكنه بناء پاپ بونی خلقی تشویق و تشجیعه مأمور ایتدی و بو دخی یالین ایاق بلنده بر ایپ و النده بر خاج بتون ممالك غربیە+یی طولاشوب درلو درلو یالانلر و مبالغه+لی سوزلرله خلقی تحریك و محاربۀ صلیبیه آرزوسی اذهان حمقایه القا ایلدی و (١٠٩٥ م و ٤٨٨ ه) تاریخنده (قله رمون) جعیتنده محاربۀ صلیبیه+یه قرار ویرلدیكی اثناده اشبو پیتر دخی برنجی قافله+نك رئیسی اولدی لكن قافلۀ مذكورە+نك ییه+جکی ایچه+جکی مهماتی پاره+سی فلانی اولمدیغندن. مجارستان و بلغارستان یوللرنده عسكرینك اكثریسی طاغیلوب كندوسی برقاچ یوز كشیله استانبوله دوندی و صكرە+کی قافله ایله قدسه واروب اوراده ایلچیلك و نطق پردازلق كبی خدمتلرده بولندی و دها صكره اوروپایه عودت و بر مناسترده انزوا و (١١١٥ م و ٥٠٩ ه) تاریخنده قزاندیغی ثوابلرله اخرته انتقال ایلدی. ١٨٥٣ م) تاریخده بونك ایچون بر هیكل ركز اولنمشدر. دین اسلامده حضرت عیسی علیه السلامك دخی اولوالعزم پیغمبران كرامدن معدود طانندیغنی و اویله بر پیغمبر ذیشانه حرمت و رعایت دیناً فریضۀ ذمت ایدوكنی و قدس شریف اوچنجی حرم سعادت بیلندیكنی پیترك و قدس پطریقنك یلمامزلكه كلوب اسلام حقنده درلو درلو افترالره تصدی ایتمسی و ایكی طرفدن بو قدر قانلرك دوكلمسنه سبب اولمسی الی یوم القیام شایان تأسفدر