)بیت الله یاخود كعبه — مکۀ مكرمه+ده اولان مطاف جلیلك نام مشهوریدر و قرأن كریمده اوچ درت یرده (بیت الحرام) و (بیت العتیق) دیو مذكوردر آدم علیه السلام روی ارضه هبوط بیوردقلرینی متعاقب بر عبادتخانه بناسنی دركاه قاضی الحاجاتدن تمنی ایتمكله (ام القرا)ده جبریل علیه السلامك تعریفی و سائر ملائکۀ كرامك همماتیله طورسینا و زیتا و حرا و جودی كبی جبالدن نقل ایدیلان طاشلرله بر تمل انشا و اوزرینه جانب حقدن بیت المعمور انزال وضع بیورلدی و بیت المعمور حضرت ادمك ارتحالنده اسمانه رفع اولنوب انجق اثری باقی اولدیغی حالده (واذبوأنا لابراهیم مكان البیت) نص جلیلندن مستفاد اولدیغی وجهله (٣٥٧٤ خ) تاریخنده یعنی هجرت نبویه+نك ایكبیك التی یوز قرق ایكی سنه مقدمنده حضرت ابراهیم علیه السلام اسكی تمل اوزرینه بیت اللهی انشایه موفق اولدی. بر روایتده اساس مزكوری حضرت ابراهیمه بیتك یرنده ارسلان شكلنده كورینان بر بلوط خبر ویرمش و دیكر روایتده حضرت جبریل كوسترمشدر. بیت شریف مذكوره مؤخراً برقاچ دفعه سیلاب و سائر كونه آقات اصابت ایلدیكندن همان تجدید و تعمیر اولندی و اك صكره یعنی اون برنجی دفعه اولمق اوزره هجرت ١٠٣٠ تاریخنده سلطان مراد خان رابع حضرتلری بالكلیه تجدید ایلدی. حرم بیت مكرمك یدی عدد مناره+سی و اون طقوز قپوسی و درت ركنی واردر و طول و عرضی یعنی ركنلرینك مابینی سكسانر ذراع معماری اولمق اوزره مؤسسدر.
ركنلرندن برینه (ركن شرقی) دیكرینه (ركن یمانی) اوبرینه (ركن شامی) و دردنجیسنه (ركن عراقی) دیرلر و ركن شرقیدن ابتدا ایله طواف ایدرلر.
بیت شریف مذكوره اك اول ملوك حمیریە+دن (كرب اسعد) (انطاع) و (برود) دنیلان قماشلردن پوشیدە+لر اورتوب مؤخراً قریش و ربیعه قبیله+لری یوز سنه قدر مناوبه تجدید ایلدی و حضرت پیغمبر افندمزك عم محترملری حضرت عباسك والده+سی (نبیله) خاتون حریردن و حضرت پیغمبر افندمز (ثوب یمانی)دن و حضرت عمر و عثمان رضی الله عنهما (قباء قباطی) دنیلان قماشدن پوشیده+لر اورتدی و عباسیلردن مأمون زماننده رمضانده بیاض و رجبده قباطی و یوم ترویه+ده قرمزی قماش پوشیده+لر اكسا ایدلدی و ملوك مصریه زمانلرنده بو صورتله تجدید اولنه كلدیكی كبی سلاطین عثمانیه حضراتی زمانلرنده و خصوصیله صوك زمانلرده دخی حریر اوزرینه صرمه ایله منسوج و مزین پوشیده+لر ارسالی معتاد اولدی.