پیاله — دولت علیه+ده (١٥٥٠ م و ٩٥٧ ه) تاریخنده قپودان اولوب اون درت سنه ایفای حسن خدمت ایتمش و پك چوق غزالرده بولنوب یوز آغرتمش اولان ذاتك لقبیدر. بو ذات مجارلی بر كوچك چوجق اولدیغی حالده (١٥٢٦ م و ٩٣٣ ه) تاریخنده وقوعبولان (مهاج) میدان محاربه+سنده بولنوب درسعادته جلب و سرای همایونده تربیه ایدلمش و تدریجاً قطع مراتب ایدرك قپودان اولمش ایدی. (١٥٥٩ م و ٩٦٨ ه) تاریخنده سچلیا و ناپولی و اسپانیا دوننماسنك جربه جزیره+سنده بالاجتماع طرابلس اوزرینه هجوم ایده+جكنی مومی الیه آق دكزده خبر الدیغی كبی اوزرلرینه واروب و جربه اطە+سی پیشكاهنده دكزك صویی دشمن قانیله قرمزی اولنجه+یه قدر دوكوشدی و اعدانك سكسان قطعه سفینە+سندن قرق عددینی غرق و قصورینی ضبط ایدرك كمال فخر و مباهات و برقاچ بیك اسیر ایله درسعادته كلدی و هركس
سیرینه چیقوب افرین خوان اولدی و كندوسنه سلطان سلیم خان ثانی حضرتلری كریمه+سی (كوهر خان) سلطانی تزویج ایتدی لكن التماسنده اولدیغی رتبۀ وزارته نائل اولە+مدی. مؤخراً رتبۀ وزارته دخی نائل اولمشدر.
پیاله پاشانك قاسم پاشا درە+سی نهایتنده ایكی دیرك اوزرنده آلتی قبه+لی غایت مصنع بر جامع شریفی و كوچك پیاله نامنده برده مسجدی واردر