لغات تاریخیه و جغرافیه

Lugat-ı Tarihiyye ve Coğrafiyye

بهلول

Behlül

بهلول — مجذوب خدا بهلول دانا حضرتلری كه خلفای عباسیە+دن هرون الرشیدك معاصری یاخود برادریدر و برچوق مطایبات حكمت آیاتی اوراقده محرر و السنۀ ناسده متواتردر. ازجمله بر جمعه كونی خطیب خطبه قرأتنه شروعله الحمدالله دیوب اشاغیسنی خاطرینه كتورە+مدیكی كبی بهلول (الذی ابتلانا بك) بیوردی. و بر دفعه سن غریبمیسك دیو سؤال ایدن بر ذاته عقلدن غریبم لكن بلده+دن دلم جوابنی ویردی. و بر دفعه دخی هارون الرشیدك الحاحی اوزرینه سرایه كلوب و یاكلشلقله حرم قپوسندن ایچرو كیروب یوقاری چیقدیغنی طواشی اغالردن بری كوره+رك بوراده نه كزه+یورسك دیو تكدیر و طشره چیقارمق مراد ایتدكده سنده بنم كبی رجالدن دكیلمیسك یا سن نیچون كزه+یورسك دیمسیله طواشی واقعا بنده رجالدنم لكن شهواتدن منقطع اولدیغم ایچون مأذونم دیدی و بو سوزك اوزرینه بهلول بر صیحه اوررق اللرینی قالدیروب (یا ربی شو آدم یالكز بر شهوت رجلیە+دن منقطع اولدیغیچون شایستۀ حرم سرای پادشاهی اولمش بن ایسه هر درلو شهوات نفسانیه+دن منقطعم كمال لطف و عنایتله بنی دخی داخل حرمسرای عاطفت و نائل وصلت ایله) دیو مناجات ایتدی و اطرافنده بولنان سامعینك كافە+سی مستغرق دریای حیرت اولدی. مشارالیهك بونلر كبی دها پك چوق وقوعات و حكایاتی واردر.