) بویالو محمد پاشا — پیر احمد چلبی نام ذاتك مخدومیدر بویالی نشانجی پاشا دیمكله معروف ایدی. مشارالیه ارباب فضل و معارفدن اولمغله جلال زاده+نك سوقیله كاتب دیوان سلطانی و بعض وزرایه تذكره+جی اولدقدنصكره (١٥٦٧ م و ٩٧٥ ه) تاریخنده جلال زاده یرینه توقیعی و سكسان برده حلبه والی و سكسان بشده نشانجی و سكسان سكزده وزیر رابع و طقسان التیده ینه نشانجی و طقسان یدیده وزیر سادس اولدی و معلولاً وفات ایتمكله ادرنه قپوسی جاده+سی اوزرنده بناء ایتدیكی مشهور نشانجی جامعی حرمنده تربۀ مخصوصنه دفن اولندی. (دیدیلر واصل حق اولدی نشانجی پاشا) تاریخ وفاتیدر. مشارالیهك بش نفر كریمه+سنی اعیان علمادن بش نفر كیمسه+یه تزویج ایلمسی محاسنندن عد اولنمشدر و سلطان سلیمان نامنه یازدیغی تاریخی نشانجی تاریخی دینمكله معروف و مطبوعدر.