پومبه — روما دولتی بیوك جنراللرندندر. بو ذات برقاچ مظفریته نائل اوله+رق كركی كبی شهرت بولدقدنصكره (قونسل) عنواننی آلوب دكز خرسزلرینی تعقیب و امحایه مأمور اولدی و طقسان كون ظرفنده بوكا دخی موفق اولدیغندن (روما معبودی) عنوانی ویرلدی و ارمنستان حكمداری (تیرداد)ك مهاجمات شدیده+سنه قارشو كیدوب
ًانی دخی فرات نهری كنارنده بوزە+رق ارمنستانه كیروب روما دولتنه نافع بر معاهده امضا ایتدیردی و متعاقبا (پتنیا) و (پافلاغونیا) و (پوننوس) ممالكنی تحت اطاعته الوب سوریه اوزرینه کچدی و اوراسنی دخی استیلا و قدس ولایتنی حمایەدن و ارمنستان حكمدارینك اوغلی (قارناق) پدرینی اعدام و جسدینی پومبه+یه تقدیم و كندوسنك حكمدارلغه تعییننی التماس ایلدیكندن مسؤلنه موافقتله اوراسنی دخی تحت حمایه+یه الدقدن صكره رومایه عودت ایلدی و بو مظفریاتنه بناء اهالی طرفندن بیوك بر الای ایله قبول اولندی (٥٥٣٤ خ) تاریخنده یعنی میلادك التمش سنه مقدمنده روما جنراللرندن (قراسوس) و (سزار) و (پومبه) سوزی پیشیروب و بینلرنده قرابت پیدا ایدوب روما ممالكنی تقسیمه قرار ویردیلر و پومبەنك عهده+سنه اسپانیا و آفریقا ممالكنك اداره+سنی تفویض ایتدیلر ایسه ده (پومبه) كتمیوب روماده قالە+رق یرینه قائممقاملر كوندردی و بو تقسیماتدن منفعل اولان روما سناتو اعضاسیله برلشوب و اهالیدن برچوق طرفدار پیدا ایدوب بونلرك سایه+سنده روما مستقل قونسللكنی قزاندی و شریك سلطنتی اولان و مقدما حصه+سنه (غول) ممالكی دوشن (سزار) پومبه+نك مركزده اوتوروب عسكرینی طاغیت و شویله ایت بویله ایت كبی امرلرینی چكه+مدیكندن اردولرینی روما اوزرینه یعنی پومبه ایله سناتو اعضاسی و طرفدارلری علیهنه سوق ایلدی و پومبه مغلوب یونانستانه و اورادن مصره قاچدقده مصر وكلاسی قبولنی تنسیب ایتمیوب قاره+یه چیقمقسزین زوجه و اوغلنك كوزی اوكنده اعدام و قفاسی تعقیب ایدن مرقوم سزاره ارائه ایتدیلر لكن سزار مصرلولرك بو جرأتلرندن ممنون اولمیوب سبب اولنلری قصاص ایلدی و پك چوق اغلدی.