بندر — بسارابیاده طورله نهری كنارنده بر كوزل شهردر. اسوچ قرالی (شارل) (پولتاوه) محاربه+سنده روسیه+لیلره مغلوب اولدیغی زمان دولت علیه+نك اوزی ایالتی سنجاقلرندن اولان اشبو (بندر) قصبه+سنه التجا ایتمش و بر قاج سنه حمایۀ دولت علیه+ده اوتوروب ینه مملكتنه كوندرلمشیدی بو شهر (١٧٦٩ م و ١١٨٣ ه) تاریخندنبرو برقاچ دفعه روسیه+لولر طرفندن استیلا و ینه استرداد اولنوب نهایت (١٨١١ م و ١٢٢٦ ه) تاریخنده بتون
بتون روسیه+لولره ترك اولندی. بندر شهرنده شمدی انجق اون ایكیبیك نفوس واردر. (بندر بوشیر) و (بندر عباس) بصره كورفزی ساحلنده دولت ایرانیه ممالكندندر و ایكیسیده اولدقجه تجارتكاهدر بندر عباس مقدما مسكت امامی ممالكندن ایكن (١٨٦٠ م و ١٢٧١ ه) تاریخنده بر كوچك محاربه نهایتنده ایران دولتنه انتقال ایلدی. بحر محیط هندیدن عدن كورفزینه كیرركن صول جهتده و افریقا قطعه+سنده و (سومال) ساحلنده دخی (بندر خور) و (بندر غاعم) ناملرله معروف برقاچ قصبه موجوددر