لغات تاریخیه و جغرافیه

Lugat-ı Tarihiyye ve Coğrafiyye

بلعم بن باعور

بلعم بن باعور — فلسطینده ایكی نهر بیننده متوطن بر زاهدك اسمیدر. موسی علیه+السلام بنی اسرائیل لشكریله موأبیلرك ملكنی استیلایه متوجه اولدیغی زمان موأب حكمداری (بلاك) اشبو بلعمی چاغیروب موسی علیه+السلامی اوزرلرندن دفع ایچون دعا التماس ایتدی بلعم اول امرده نصل دعا ایدرم كه موسی ربیمك اهلندندر دیدیسه ده ایدیلان ابرام و رشوته طیانه+مدیغندن بددعا ایتمكله اسم اعظم و ایماندن ییلان دریسندن صوییلور كبی صویلدی و كفر و الحاده دوشوب دین و دنیاسی خراب اولدی. مرقومه رؤیاسنده صاقین بددعا ایتمه دیو تنبیه اولنمش و بددعا ایچون موسی علیه+السلامك اردوسنه كتمك اوزره بندیكی مركب لسانه كلوب بو عملدن فارغ اول زیرا بنی اسرائیلك حركتی امر آلهی+یه موافقدر دیمش اولدیغی حالده جسارتی شایان تعجبدر بلعم ابراهیم علیه+السلامك صحفنی كورمش و اسم اعظمه كسب وقوف ایتمشیدی. مفسرین كرام (واتل علیهم بناء الذی آتیناه آیاتنا فانسلخ منها) آیت كریمه+سنی قول مشهور اوزره بلعم حقنده تفسیر ایدرلر.