بلال — اسلامده اك اول ایمان ازلیسنی اظهار ایدن ذوات كرامدن بلال حبشی رضی+الله+عنه حضرتلری مكه اهالیسندن برینك كوله+سی ایدی اسلام ایله مشرف اولدیغنده كندوسنه پك چوق اذا و جفالر ایتدیلر و بر دفعه بویننه ایپ طاقوب و ایپك اوجی چوجقلرك اللرینه ویروب سوقاق سوقاق كزدیردیلر حضرت مشار+الیه بونجه حقارته تحمل ایدرك و (الله بر الله بر) دیه+رك اسلامیتنده ثبات ایلدی مؤخراً ابو بكر الصدیق رضی+الله+عنه حضرتلری صاتون آلوب آزاد ایتمسیله داخل حضور حضرت پیغمبری اولدی و بش وقتده اذان محمدی اوقونمسی سنت سنیۀ اسلامیه+دن اولمسنه قرار ویریلدیكنده طرف عالیء حضرت پتغمبریدن موذن تعیین بیورلدی و ارتحال نبوویه قدر بو خدمتی ایفا ایدوب ارتحال حضرت پیغمبری وقوعنده شامه هجرتی تصمیم ایتمكله حضرت ابو بكر یا بلال بوراده طوروبده زمان سعادتده
مأمور اولدیغك خدمتی ادا ایتسه+ك اولمازمی دیمسنه حضرت بلال (سرور كائناتك افتراقنه تحمل ایده+میورم) جوابنی ویروب جانب شامه عزیمت و اوراده اختیار عزلت بیوردی بر مدت صكره رؤیاسنده جانب سرور عالمدن مدینۀ منوره+یه دعوت بیورلمغله فی الفور عودت ایدرك بادیء امرده اهل بیت رسول اللهی سؤال ایدوبده آلدیغی جوابده نام فاطمه رضی+الله+عنها یاد اولنمامسندن اوتوری غایت متأثر اولدیغی حالده برده حسنین افندیلریمزه راست كلوب انلردن والدە+لرینك ارتحالنی تحقیق ایتمكله تأثری آرتوب و طوغریجه مشار+الیهانك قبر سادتلرینه واروب پك چوق اغلادی و احبانك التماسنه مبنی صلاة ظهر اذاننی اوقومغه شروع ایدوب (الله اكبر الله اكیر) دیدیكنده مدینۀ منوره ایچنده دفعة بر فریاد و واویلا قوپدی و (و اشهد ان محمداً رسول الله) دیدیكنده هركس عصر كرین حضرت رسالتی تخطر ایدرك بیهوش و سركردان اولدی و مخدرات نسوان كریان و عریان زقاقلره دوشدی صانكه اول كون روز قیامتدن بر نمونه اولدی و اذانی بتوردكدن صكره خلقه برچوق نصیحتلر ایدوب تكرار شامه كتدی و ارتحالنه قدر ییلده بر كره مدینۀ منورە+یه واروب مسجد رسول اللهده اذان اوقومغی عادت ایتدی. مشار+الیه بر سحر وفتنده نزد حضرت پیغمبری+یه واروب (الصلوة خیر من النوم) دیە+رك ایقاظه مبادرت ایتمكله حضرت پیغمبر افندمز یا بلال بو نه كوزل كلام دیو غایت استحسان ایدوب صباح اذاننه علاوه+سنی امر و فرمان بیورمشدر. (رحمة الله علیه)