لغات تاریخیه و جغرافیه

Lugat-ı Tarihiyye ve Coğrafiyye

بكرش

Bükreş

بكرش — رومانیا حكومتنك مركز اداره+سیدر. بو شهر (رونبودیچه) نهری كنارنده یوز قرق بیك نفوسی جامع بر شهر اولوب كوزل هوتللری و حكومت دائره+سی و حوالیسنده منتظم بغچه و مسیرە+لری وجسیم كلیسالری واردر. رومانیا ممالكی اوته+دنبرو دولت علیه+نك افلاق و بفدان ولایتلرندن متشكل مملكتین نامیله بر ممتاز ایالتی اولدیغی حالده درسعادتده فنارلیلردن كوندریلان روم ویودە+لرك بعضیلری دولت علیە+یه صداقتله خدمت و محارباتده پك چوق معاونت ایدوب بعضیلری دخی اجنبی تشویقاتیله حال عصیانده بولنور و اوزرلرینه عسكر سوقیله تربیه اولنور ایدی مؤخراً وقوعبولان التماساته مبنی امتیازلری توسیع و (١٨٥٧ م و ١٢٧٤ ه) تاریخنده افلاق ویوده+لغیله بغدان ویودە+لغی توحید اولندیسه+ده اجنبی الفااتی و اهالینك قناعتسزلكی بونكلە ده برطرف اوله+مدی و اهالیء مرقومه+نك (١٨٦٦ م و ١٢٨٣ ه) تاریخنده ویوده بولنان قوزه بكی بعض تهدیدات ایله قاچیرملری اوزرینه پروسیا زادكانندن (شارل هوهزنولرن) خود بخود كلوب ویودەلق مقامنه اوتوردی و براز مدت صكره دولت علیه مومی+الیهك بكلكنی تصدیق ایدوب فرماننی كوندردی مملكتین دولت علیە+نك بونجه لطف واحساننی كورمش اولدیغی حالده (١٨٧٧ م و ١٢٩٤ ه) تاریخنده دولت علیه علیهنه محاربه آچان روسیه دولتیله اتفاق ایدرك سلاحنی دولت علیە+یه چویردی و بعد المصالحه برلینده عقد اولنان قونغره قراریله روسیه+یه ایتدیكی معاونتك مكافاتنی یعنی اوته+دنبرو آرزو ایتدیكی استقلالی قزاندی. (بكرش) سرور مملكتی دیمكدر.