اءمه — دین مبینی اقامه ایله خلیفۀ رسول الله و امام المسلمین عنواننه نائل اولان جناب (ابو بكر الصدیق) و(عمرالفاروق) و (عثمان ذی النورین) و (علی المرتضی) رضوان الله تعالی علیهم اجمعین حضراتنه چار یار كزین. و خلفاء راشدین دیدكلری كبی ائمۀ اربعه دخی دیرلر امامتی جناب علی المرتضی و اولاد كرامنه منحصر طوتانلردن (اثنی عشریه) دنیلان فرقه اصحابی (امام علی) و مخدوم عالیلری (حسن) و (حسین) و (زین العابدین علی بن حسین) و (محمد الباقر بن زین العابدین) و (جعفر الصادق بن محمدالباقر) و (موسی الكاظم بن جعفرالصادق) و ( علی الرضا بن موسی الكاظم) و (محمد الجواد بن علی الرضا) و (علی الهادی بن محمدالجواد) و (حسن العسكری بن علی الهادی) و (محمد المهدی بن حسن العسكری) رضوان الله علیهم اجمعین حضراتنه (اءمۀ اثنی عشر) دیوب بونلردن ایلروسنه كتمزلر. و (اسماعیلیه) دنیلان فرقه اصحابی جعفرالصادق حضرتلرینه قدر اثنی عشریه ایله برابر كیدوب اندن صكره امام موسی الكاظم حضرتلرینك یرینه بیوك برادری (اسماعیل) و اندن صكره (محمد المكتوم بن اسماعیل) و اندن صكره (جعفر المصدق بن محمد المكتوم) واندن صكره ( محمد الحبیب بن جعفرالمصدق) و اندن صكره (عبدالله المهدی بن
محمد الحبیب) حضراتنی امام طانورلر. و (رزامیه) فرقه+سی دخی امامت جناب علی المرتضادن اوغلی (محمد الحنفیه)یه و اندن اوغلی (ابی هاشم) و اندن وصیت ایله (علی بن عبدالله بن عباس)ه و اندن (محمد بن علی)یه و اندن ینه وصیت ایله اوغلی (ابراهیم)ه انتقال ایتدی دیرلر. اشبو ابراهیم خلفای عباسیه+نك برنجیسی اولان (سفاح)ك قرنداشیدر. ابا مسلم خراسانی خلقی ابتدا بوكا بیعت ایتدیرمشیدی اعتقاد كلمه+سنده اسماعیلیه و رزامیه فرقه+لرینه و سائرلرینك اسملرینه دخی مراجعت بیوریله. مجتهد فی الدین اولان امام (ابو حنیفه) و (محمد الشافعی) و (مالك بن انس)و (احمد بن حنبل) حضراتنه دخی (ائمۀ اربعه) دیرلر)